يوم ......... مش طبيعي

اليوم ده هو يوم 25 / 1 / 2007
ايه اللي حصل؟
اللي حصل بجد ميتحكيش لانه مش هيتصدق مفيش حد بيحصله كل ده ف نفس اليوم الا انا

المهم:
اليوم ده كان اخر يوم في امتحانات الترم الاول لسنه تالته صيدله ماده اسمها bio chemistry
. في البدايه ليله الامتحان باليل لايمكن اقدر اوصف مدي الالم اللي كان عندي بسبب ضرسي كان وارم وتاعبني ومقدرتش اذاكر من شدة الالم
. المهم ضغطت علي نفسي واستحملت وذاكرت اي كلام واخدت مسكنات وكان ميعاد خروجي من البيت الساعه الرابعه صباحاعشان تبدأ الرحله واركب قطر 5:30 من المنصوره اللي هيوصل القاهره الساعه 8:30 وادخل الامتحان الساعه 10 اخرج منه 12 والحق قطر 1:20 في رمسيس واركبه واكون في البيت علي الساعه 6 (ده الطبيعي) ايه بقي اللي حصل؟

في الاول اجي خارج من البيت الاقي مقابلني عند اول شارعنا حوالي عشرة من الكلاب الضاله المهم استنيت شويه ورميتهم بالحجاره وقدرت اتصرف , بعدين المفترض اني هلاقي كائن عندنا اسمه (توك توك) اركبه يوصلني الموقف ملقيتش, قلت عادي بتحصل
رحت الموقف المهم استنيت اصحابي, ورحنا لمحطة المنصوره وهنركب القطر وبالفعل ركبناه ومشي القطر في الطبيعي وانا بتعصر من الالم اللي في ضرسي , القطر بدأ يهدي وحسينا ان ده مش الطبيعي بتاعه وجه القطر عند بنها ومتحركش ولا خطوه , الوقت بيمشي الساعه بقيت 9 والمسافه من بنها للقاهره 50 دقيقه يعني اكون في رمسيس 10 يعني ملحقش الامتحان ابتدي الرعب يتملكني المهم شويه وجه قطر تاني رايح وصلنا القاهره الساعه 10 بالظبط, كنا اربعه اصحاب ملقيتش غير واحد كله اتفرق وبقينا انا وهو خرجنا بسرعه عشان نركب اي حاجه رايحه مدينه نصر جامعه الازهر وبالفعل ركبنا بس نسينا نسأل السواق هياخد طريق ايه , طبعا الباقي متوقع اخد طريق تاني وبعد مليون محاوله ومحايله وتدمير في الاعصاب وافق يروح الجامعه ونزلنا قبل البوابه بمشوار حوالي نص كيلو المهم اخدته جري انا وصاحبي وصلت ادام اللجنه الساعه 10:40 برضه اتحايلنا ع الدكاتره ودخلنا طلبت ليمون عشان اهدي وحليت علي اد ماقدرت وخرجت عشان امتحان الشفوي والدكتور بص ليا لقاني شكلي علي ازرق قالي مالك يابني ..حكيتله والراجل قدر معرفش عطاني كام المهم قلت امشي بقي اروح بيتنا كده كفايه مستنيتش حد من اصحابي وقرت امشي اخدت باص من الجامعه لمحطة رمسيس واستنيت القطر ومن الواضح ان مصر كلها كانت مروحه في القطر ده وكلهم خلصو امتحانات, دخل القطر المحطه كل الشباب رايحين يركبوا وكله بيتزاحم والقطر ماشي ف طريقه داخل المحطه , في شاب كان باين عليه انه اول سنه جامعه حب يعمل زي باقي الشباب بس راح يركب عكس اتجاه القطر ,,,,,,,,, طبعا الباقي متوقع ... ايده فلتت من ضغط الشباب نزل تحت القطر الكل بيصرح رحمتك يارب....
(البقاء لله) الواد اتفرم ادام عنيا طبعا مقدرتش استحمل رجعت ورا وقعدت علي كرسي من المحطه وغبت عن الوعي حوالي نص ساعه صحيت والساعه كانت 2 القطر كان مشي والجثه متغطيه بملايه وكلمو اهله هييجو ياخدوه قلت مفيش حل تاني انا راجل ولازم اتماسك , رحت موقف عبود بتاع البيجو والتيوتا اتخانقت مع الكمسري بتاع الباص بالكلام لانه عيل سافل وقليل الادب . وصلت موقف عبود وركبت بيجو 7 راكب ومشيت العربيه قبل ماتوصل بلدنا بحوالي 2 كيلو وانا كنت راكب في الكرسي الامامي فوجئت بعاصفه من الدخان خارجه من التابلوه . الاسطي وقف العربيه خرجنا بره وشاف فيه ايه ؟ لقي كل الكهرباء بتاعت العربيه ساحت فصلهم عن بعض . وزقه للنبي ودارت العربيه وصلت للبلد ومنظر الواد مش مفارقني . دلوقتي بقي بدور علي نفس الكائن اللي قلت عليه( التوك توك) قلت لنفسي كده وانا ببص علي رجلي اروح علي رجليا دول بتوعي ولا اركب . قلت اركب ركبت توك توك وف وسط الطريق
في كائن تاني اسمه جرار زراعي ميل ع التوك توك بس كان ماشي براحه وده خلي التوك توك وشه وجنبه كده يطبقو وطبعا مش عايز احكي عن الرعب اللي كنت فيه.المهم نزلت من التوك توك وانا حاسس ان مفيش في جسمي نقطه دم . حاولت اوصل بيتنا ولو زحفا وبالفعل وصلت .بس لا يمكن حد يتخيل منظري وانا داخل .. والدتي اول لما شافتني مبطلتش دموع وهكذا كل اللي احكيله او يعرف
لكن علي كل حال الحمد لله
ودي مواقف الواحد بيتعلم منها
بس اللي حصل ده كتيييييييييييييييير علي اي حد انه يستحمله

برقش