تا ا ا ا ا ا ا ا ا ا ا ا ا ا ج

التاج الغالي ده جالي من شيماء الجارحي اللي انا بجد بحترمها وبحب مدونتها اوي وبكن لها كل تقدير واحترام

التاج بيقول

(1) اذكر 10 اشياء عن نفسك

• · انسان بسيط بحب كل الناس والحمد لله عمري ماكان جوايا ضغينه او كره لحدوبحب ربنا اوي وسيدنا محمد عليه الصلاة والسلام ووالدي ووالدتي واخواتي واصحابي بحبهم جدا واتمنالهم كل خير وتوفيق وربنا يسعدهم بغض النظر عن حبي لاهلي واصحابي في مكان في قلبي محجوز لحد معين مينفعش يبقي بتاع حد تاني

• · بيقولوا عليا مثقف وكمان بيقولوا دكتور شاطر رغم ان حلمي من وانا صغير اني اكون مهندس الكترونيات لان في شوية سلوك ضاربه جوا دماغي . كان مجموعي حوالي 98 % ودي حاجه مش سهله باعتباري ازهري كان ممكن ادخل طب واسكن كمان مدينه جامعيه لكن اخترت صيدله عشان اسرع وبصراحه اكتر الحسبه كانت ماديات واجتماعيات اكتر منها تحقيق ذات لان زي ماقلت حلمي كان هندسه بس شغل هندسه يعني وسايط وهذا مالا املكه والحمد لله تقديراتي امتياز وجيد جدا دايما ....... دعواتكم

• · بحب مصر اوي وهناك اختلاف بين مصر ارض ومصر شعب ومصر حكم بعشق اول اتنين وربنا يجعل كلامنا خفيف ع التالته مش عارف لو ربنا كتبلي سفر هبعد عنها ازاي
  

• · بحب الرياضه اوي وانا اهلاوي متطرف وبحب اشجع المنتخب وبحب اللمه الحلوه وقت الماتشات ياريت كل يوم يبقي بطولة كأس الامم بلعب كرة قدم وكمان جيم وبحب الشطرنج والعاب الذكاء
  

• · بحب اوي اساعد أي حد في أي وقت واكتر حاجه بتخنقني اني اشوف حد مظلوم ومقدرش اساعده وبجد ممكن اودي نفسي ف داهيه لمجرد رفع الظلم عن حد خصوصا اصحابي ولو حصل مشكله عندنا في الجامعه لحد من صحابي بحب ابقي موجود واتكلم مع الدكاتره وبفرح لو المشكله اتحلت وكنت انا السبب بكره القهر بمعني ان حد يستغل سلطته في تنفيذ رغباته واكبر مثال اساتذة الجامعات والتحكم الغريب بتاعهم والصمت المكره بتاع الطلبه

• · اتمتع بخاصيه لا يتمتع بها كثير غيري وهي الهم البكر ....... يعني ايه هم بكر؟ يعني هم متفصل عشاني حاجه مبتحصلش لاي حد حاجه ايكسكلوسيف ليا مش هقدر اتكلم في النقطه دي كتير
  

• · من اهم عيوبي الغيره هي الحمد لله مش بتوصل لدرجة الشك لكني بجد غيور بطريقة تدايق ايوه بعترف انها تدايق وبجد اللي بيتعامل معايا بيتخنق من غيرتي دي واحيانا بتكون سبب للمشاكل بيني وبين حد عزيز عليا وهي غيره علي النساء اللي يخصوني زي اهل بيتي مثلا او بصفه عامه كل نساء المسلمين نفسي اغمض عيني وافتحها الاقي كل البنات بقوا ملتزمين بمعني الكلمه نفسي الاقي كل البنات بيقولوا سمعنا واطعنا ونبطل جدال عقيم ... ولله الحمد كل اهل بيتي بيلبسوا النقاب واختي الصغيره في الطريق وملحوظه مهمه انها بتبكي عشان تلبسه ومقتنعه تماما واحنا اللي بنقولها لسه بدري والله انا حاسس بالفخر بجد سوري طولت في النقطه دي بس بجد هي تستاهل

• · عيب كمان : انا اناني جدا في حبي يعني وقت الارتباط اتمني ان خطيبتي او زوجتي تكون ملكي واكون كل حياتها واشغل كل تفكيرها يعني احس انها عايشه ليا بعد ربنا يعني العيب ده معناه اني بحب حب تملك بس والله معايا حق لانها هتبقي هي كمان مالكاني وتبقي كل تفكيري افتكر اني استاهل ابقي كل تفكيرها

• · ميزه وعيب : ايجابي اوي وسلبي اوي يعني انا ايجابي في المشاكل اللي تخصني والمشاكل اللي تخص الناس اللي تهمني ودايما احب ابقي ابن بلد واخدم وسلبي في المشاكل اللي احس انها مينفعش تتحل زي مشاكل مصر من غلاء وسلطه ومشاكل لا حصر لها مع الاعتذار لكل المدونين الثوريين وللاخوان المسلمين لكن كلكم بقالكم كام سنه بتنتقدوا ومفيش حل الفرج من عندك ياربعارف واحد من الاخوان هيقولي مهو امثالك هما اللي جايبينا ورا هقوله حقك عليا اعتبرني متكلمتش لكن انا هبدأ بنفسي واكون حد محترم وملتزم ولو كلنا بقينا ملتزمين اكيد ربنا هينصرنا
  

• · اخر حاجه : رغم الاطاله اتمني اكون كنت ضيف خفيف وعايز في الاخر اسجل حبي وتقديري لكل المدونين الجامدين اوي اللي انا شخصيا بحبهم جدا وفرحان فرحه مختلفه من ساعة ما بقيت مدون والفضل يرجع لربنا ثم لمحمود سعودي صديقي في الجامعه هو اللي خلاني اتعرف علي ناس شربات زيكم وهاخد منه كلمته المشهوره : بحبكم
  

(2) خمس اشخاص اهديهم التاج

· امل وشمس اللقاء

· عاشقة النقاب

· شيرين وتمر المدينه

· محمد فكري

· ياسر

(3) سبب اختياري لهم : انهم بجد شخصيات جميله اتمني اعرف جوانب من حياتهم يعني بيحبوا ايه وبيكرهوا ايه كده يعني وفي كمان مدونات تانيه جميله بس انا شفتهم مجاوبين ع التاج قبل كده ... والله بحب كل المدونين اوي وربنا ينفع بينا يارب

كمان التاج بيقول بلغ اللي بعتلك التاج انه وصل وييجي يشوفه حاااااضر هروح لشيماء هانم اهه