كلنا .. كل يوم بنقابل ناس وبنتعرف علي ناس جديدة واحيانا التعارف بيقلب لصداقه ممكن تستمر خصوصا لو كنت لسه داخل الجامعه جديد محتاج تكون ما يسمي بالجروب او الشله او كنت مسافر جديد لبلد غريب محتاج تعمل اصحاب وهكذا
اكيد ده بيحصل لنا كلنا ... مش دي المشكلة ...
المشكله بقي .... هي الشخص اللي انا اتعرفت عليه ده اتعامل معاه ازاي
عندي حل من اتنين
- اتعامل معاه بحب واكون واد ابن بلد وعـِشَرى وعتره وابدأ اقربه ليا وهكذا .... مع العلم اني جربت الاسلوب ده وحبيت ناس وبقينا اصحاب لكن للأسف لسبب ما مكنش في تفاهم واصبحنا دلوقتي بنتكلم مجامله او الحل التاني
- احاول اتجنبه مبدأيا وتكون تصرفاتي ردود افعال بمعني اني استني منه الفعل ويكون مني انا رد الفعل... يعني مثلا اتوقع انه انسان مش كويس عشان متصدمش فيه ووالله بقي كويس خير وبركه ........ مبقاش يبقي مخسرناش
من الاخر ( الشخص اللي انا اتعرفت عليه جديد ده .بريء حتي تثبت ادانته . ولا مدان حتي تثبت برائته )
بجد الموضوع ده شاغلني جدا واعتقد انه يهم كل الناس يا ريت اللي يقدر يفيدني ميتأخرش عليا
bar2ash
هناك 12 تعليقًا:
السلام عليكم
ده أول مرة ادخل علي المدونه ...هي جميله
و بخصوص الموضوع ...رأي ان صحبك برئ حتي تثبت ادانته
لأننا المفروض عند التعامل مع اي شخص نتعامل معاه بحسن نيه الي ان يصدر منه شئ سلبي او مش كويس ..لأن ديننا بيأمرنا بكده
و في نفس الوقت مانثقش في اي شخص بسهوله ..بمعني انك ماتقولوش اسرار ممكن يؤذيك بيها
انا بصراحه بعمل كده في تعاملي مع الناس ...و الحمد لله ما اتصدمتش في موضوع الأصدقاء قبل كده
أصل كمان الناس مش كلها ملائكه و في نفس الوقت مش كلهم شياطين
سعدت بزيارة المدونه (:
شوف بقي ياسي برقش
البوست حلو اوي
بس انا مع الرأي التاني انك متديش الامان لاني بصراحه موجوعه اوي من النقطه دي يعني شوف الشخص خاين لحد ما يظهر انه امين صدقني كده هتحافظ علي نفسك
بيري
اولا سلامو عليكم
ثانيا : يا دكتور برقش حكاية انك تعتبر صديقكك اللى اخترته برئ حتى تثبت ادانته مش عارفة حسستنى اننا فى محكمة بقى وس وج وحاجات جامدة كدة مع ان المووضوع مش مستاهل ده ابدا
لما كنا فى الجامعة والجامعة مجتمع كبير فيه الكويس وفيه الوحش كان من وجهه نظرى صعب اوى ازاى اخوض فى وسط الزحام ده كله واكون ليا اصحاب وهكذا
بس كان ليا مبدأ دلوقت اتغيير مع الوقت والعمل وحاجات كتير كنت زمان مش بحب مجرد انى اصاحب وادخل فى شلل وخلاص لأ انا على استعداد اصبر شوية واتعب فى الاول شوية لحد ما الاقى الانسانه الكويسه والناس الكويسه بيبان عليهم وكمان فيه ناس بيكون بينا كيما مشتركة حتى لو فيه وده اكيد اختلافات فى الشخصية والطباع وما الى ذلك
تعامل بطبيعتك عادى وبتلقائية وتذكر انك بتعامل ربنا من التعامل هيبان الشخص اللى قدامك لو كويس خير وبركة استمر فى صداقتك والصديق الكويس بيجر معاه باقى الناس الكويسه وهتلاقى مرة واحدة الصديق بقوا كمان مة شله كبيرة وكلهم او معظمهم من اخيار الناس وده من واقع تجربة شخصية
والشخص اللى حسيت انه بيستغل طيبتك او صدقكك ابتعد عنه على طول واحمد ربنا ان ربنا كشفه ليك
مش عارفةب قى كلامى زود عندك حاجة ولا لأ بس المهم انك من الاول متصاحبش اى حد والسلام لأنك مختاره على مبدأ معين
وتعامل معاه عادى وهيبان من التعامل بعد كدة
وان شاء الله ربنا يوقعك فى ناس كويسه وطيبه وتفضلوا اصحاب طول العمر
من غير بقى ادانه ولا يحزنون
هاههههههههههه
السلام عليكم ورحمة الله
دى كمان كانت مشكلة عندى انى بتعامل بحب وصدق مع الناس
لكن الرأى الارحج والصائب بعد التجارب هو انى اكون حذرة واتعامل كويس وحلو لكن بحذر الى ان اعرف مين الشخص داا
كل الاحترام لك
مدونة حلوة وبالتوفيق يارب
برقش موضوعك جميل ومهم اوي
مدونتك لذيذة وظريفة
الواحد مفروض يتعامل مع الناس بلا استثناء كويس سواء بقي الشخص اللي اتعامل معاه كان كويس او لا هو بيتعامل مع الله مش مع الناس بس طبعا لا يمنح ثقته لاي حد مش في يوم وليلة يروح يحكيله اسراره وخباياه
ربنا يوفقك ويبقي عندك اصحاب كتير
يا فندم دا طبع انك تتعامل بثقة او بشك بس اقولك حاجةاتعامل عادى بس متثقش اوى وحطه ف اختبارات يمكن تعرف بسرعة وبعدين يموت المعلم ولم يتعلم مش كدةربنا يديك طول العمر والصحة والسعادة و مزيد التقدم امييييييييييييييييييييييين
انت ليه شاغل بالك بالناس اصلا ومع ذلك لو عايز الحل الحل اهوه لا يؤمن احدكم حتى يحب لاخيه مايحب لنفسه اتعامل معاه ذى متحب انه يتعامل معاك بس كده وبعدين مش ضروري يعنى تتصاحب علي ناس كتيره من رايي ممكن واحد بس يغنيك عن عشره ويكون لك اوفى منهم ياعم الدكتور ربنا يوفقك ويكتبلك كل خيرويبعد عنك ولاد الحرام
السلام عليكم
مدونتك ابنى ابراهيم ابو المجد تستحق الزيارة لصراحتك وعفويتك وصدق ما تكتب عجبنى جدا اسلوبك فى الكتابة وحاعلق هنا وحاعلق هناك وهناك بس رجاء ازالة تأكيد الكلمة أسفل مستطيل التعليق ده عشان تسهل علينا وبتتشال من الاعدادات
المتهم برىء حتى تثبت ادانته متبقاش زى الحكومة
السلام عليكم
دى اول مره اكتب فى مدونتك ياهيما
بصراحه جامده
اما عن رأيى فى الاشخاص الجدد
انا بقول اتعامل بطبيعتك لكن ماتديش الامان الكامل لحد ماتقدر تتاكد من طبيعة الشخص اللى انت اتعرفت عليه
علشان انا فى اشخاص كتير عرفتها لكن بعدها عرفت انه ماينفعش نكون اصدقاء
بس وانت بتكلمه لاول مره خلى عندك طابع انه انسان كويس
لان ده المفرروض يكون الطبيعى عند كل الناس
بس هو ده رايى يابرقش
اخوك ابراهيم محمود
بنهاوى على طول
الموضوع جميل اوي وفعلا محير بس مش لازم ندي الامان للناس علي طول كده لان فيهم بيبقي مش كويس ومش بيبان في البدايه والمعظم بقي كده الوقتي
أزيك يا عم برقش
لسه زعلان من أمبارح ههههههههه
انا جاى اكمل وصله الغلاسه هههههههههه
شكلك هتسمينى الرخم هههههههههه
شفت الموضوع الى انت منزله ده الموضوع ده بتاعى
متفهمش غلط
بالضبط زى ما تكون بتحكى عنى
طبيعى انا مش صعب عليا أكون صداقات كتير وفى وقت قصير
لكن من كتر ما أنا مش ببقى مطمن
ببقى مش عايز أجازف عشان كدة ماليش أصحاب كتير اقصد اصحاب بمعنى الكلمه مش مجرد زملاء ومعارف
لكن فعلا اتعامل مع الناس بحسن نيه
ومن جواك أفترض النيه الوحشه
عشان لا تتفاجيء ولاتتصدم
انا بعمل كده بصراحه
وفي حكمه بتقول:
ليس صعبا أن تصنع الف صديق في عام
لكن الاصعب أن تصنع صديق لألف عام
مش عارف بقى أذا كنت قلتها صح ولا لا
شكرا على زيارتك الي نورتنى
وأتمنى نبقى أصحاب ( بس أوعى تتوقع حسن النيه معايا ) هههههههههههه
واوعى تفهمنى صح ههههههههههه
عشان لو فهمتنى صح هتبقى فهمتنى غلط ههههههههههههههههههههههههه
دمت متألقا .. وفى رعايه الله
هيوم فى حلول وسط اصل مش ينفع ابقى عادى مع كل الناس وياخدو عليا كده وكمان مينفعش ابقى قفل واخرج عن طبيعتى بس احنا بشر واكيد محدش عارف الحلو فين والوحش مين بس احنا عندنا احساس هتعرف منه انت هترتاح مع ده ولا؟
احنا لينا الظاهر
عرفت انى انا متكبره خالى بيقولى كده
كوكو
كركر
إرسال تعليق